Skimun fyrir kórónuveirusmiti verður gjaldfrjáls fyrstu tvær vikurnar á Keflavíkurflugvelli en mun svo kosta ferðamenn 15.000 krónur. Valkosturinn við þessa greiðslu er að sæta sóttkví í tvær vikur. Þetta var samþykkt á ríkisstjórnarfundi í dag og kom fram í tilkynningu heilbrigðisráðuneytisins. „Gjaldið sem innheimt verður frá 1. júlí næstkomandi miðast við beinan kostnað ríkisins annan en stofnkostnað og er miðað við fyrirliggjandi kostnaðargreiningu sem fram kemur í skýrslu verkefnisstjórnar um sýnatöku fyrir COVID-19 á landamærum sem kynnt var í ríkisstjórn 26. maí síðastliðinn“ segir í tilkynningunni. Ráðuneytið telur rétt að sýnataka verði gjaldfrjáls á meðan verið væri að ýta úrræðinu úr vör og leysa úr mögulegum hnökrum.

Miklir hagsmunir eru undir og hafa andstæðar fylkingar tekist á um hvort rétt sé að opna landið á þessum tímapunkti. Takast þar á lýðheilsuleg sjónarmið þeirra sem vilja fresta opnun landsins alfarið og svo þeirra sem telja opnun landsins nauðsynlega efnahagslífi þjóðarinnar. Eins hafa margir spurt sig hvort rétt sé að ríkið standi alfarið undir kostnaðinum sem hlytist við skimun sem er forsenda þess að opna landið.

Með þessari tilkynningu heilbrigðisráðherra virðist lokaákvörðun tekin um opnun landsins þann 15. júní næstkomandi, eftir rétt rúmlega tvær vikur, og hvernig staðið verði að skimun. Nú þegar hafa sex flugfélög tilkynnt að þau muni fljúga til landsins frá 15. júní og Lufthansa hefur lýst áhuga sínum á að hefja flug til landsins strax í júlí.