„Ég lýsi algjörlega yfir sakleysi mínu. Það er bara verið að reyna koma á mig einhverri sök og drulla yfir mig,“ segir Anna Aurora Waage Óskarsdóttir  í viðtali við vef Mannlífs.

Anna var handtekin í gær grunuð um að hafa villt á sér heimildir til að starfa réttindalaus sem sjúkraliði í bakvarðasveit Heilbrigðisstofnunar Vesturlands, auk þess sem hún var sökuð um lyfjastuld.

Anna segist ekkert hafa að fela og hún hafi sýnt fulla samvinnu. Við húsleit lögreglunnar hjá henni hafi ekkert fundist.

Anna segir enn fremur við Mannlíf:

„Ég sagði allan tímann frá því að ég væri með erlent próf en ekki íslenskt, sem ætti eftir að meta. Úti er þetta sem sjúkraliðapróf og síðan er ég líka með annað próf sem er ígildi háskólagráðu. Ég tilkynnti það strax á minni umsókn að ég væri með erlend próf og það voru allir meðvitaðir um það enda tilkynnti ég það líka strax við komuna vestur. Það gerði ég um leið og ég mætti og það stóð á öllum plöggum. Það var allt uppi á borðum frá upphafi, ég var alls ekkert að reyna að falsa neitt.“

Á upplýsingafundi um COVID-19 í dag áréttaði Alma Möller landlæknir að Anna hefði ekki starfsleyfi sem sjúkraliði og hún hefði ekki sótt um slíkt leyfi hjá embættinu.

Einnig kemur fram í viðtalinu að Anna ætlar að stefna Gylfa Ólafssyni forstjóra Heilbrigðisstofnunar Vestfjarða og lögreglustjóranum á Vestfjörðum.