Á öðrum tímanum í nótt var karlmaður á fertugsaldri handtekinn nærri fyrirtæki í Garðabæ eftir að innbrotsboð bárust frá því. Maðurinn reyndi í fyrstu að fela sig og síðan hlaupa á brott en lögreglumenn náðu honum. Hann var vistaður í fangageymslu.

Á tíunda tímanum í gærkvöldi missti ökumaður strætisvagns stjórn á vagninum í Breiðholti og ók á ljósastaur, yfir umferðareyju og endaði vagninn á tré. Hann skemmdist mikið og er óökuhæfur. Farþegi í vagninum slasaðist í andliti.

Karlmaður var handtekinn í nótt grunaður um heimilisofbeldi. Hann var vistaður í fangageymslu.

Tveir ökumenn voru handteknir, annar í Bústaðahverfi og hinn í Grafarvogi, í nótt grunaðir um að vera undir áhrifum áfengis og/eða fíkniefna.