Agnes M. Sigurðardóttir, biskup Íslands, er gestur Sigmundar Ernis í viðtalsþættinum Mannamál sem verður frumsýndur annað kvöld á sjónvarpsstöðinni Hringbraut. Í kynningu um þáttinn á vef Hringbrautar kemur fram að í þættinum mun Agnes opna sig um kynferðislega áreitni og skilnaðinn sinn.

Kynningin segir einnig að Agnes þekki vel til kynferðisofbeldis á eigin skinni. Hún minnist bæði andlegs og líkamlegs áreitis frá því hún var að hefja prestskap sinn í kringum árið 1980. Þá segir að hún hafi jafnvel verið hundelt í þessu tilliti. „Karl­remban og tóm­læti feðra­veldisins í seinni tíð hafi líka birst henni oft í biskups­em­bætti.“

Agnes talar einnig opinskátt um skilnaðinn sinn við eiginmann sinn og barnsföður í þættinum. Í kynningunni segir að „hún hafi grátið inni í sér svo árum skipti – og þessu hafi fylgt svo ó­skap­lega mikil skömm fyrir sóknar­prestinn í plássinu að hún hafi átt erfitt með að þjónusta bæjar­búa.“

Spurðu hvort þau myndu deyja um nóttina

Agnes mun í þættinum rifja upp æskuárin sín á Ísafirði. Faðir hennar, sóknarpresturinn Sigurður Kristjánsson, stóð vaktina þegar sjóslys voru tíð á bænum. Agnes segist hafa ákveðið að gerast aldrei prestur þegar hún var ung vegna þessa, eða að minnsta kosti ætlaði hún ekki að gerast prestur í sjávarplássi. Agnes varð þó á endanum prestur í sjávarplássinu Bolungarvík en skömmu seinna komu snjóflóðin í Súðavík og á Flateyri. Vikum saman eftir flóðin spurðu börn Agnesar móður sína hvort þau myndu deyja um nóttina.

Hægt er að horfa á Manna­mál klukkan 20:00 á fimmtudögum á Hring­braut