Líkt og flestir borgarbúar hafa tekið eftir þá staflast rusl nú upp um alla Reykjavík vegna verkfalla. Hin íslensku Gulu vesti hafa boðað til nokkurs konar mótmæla þar sem allir eru hvattir til þess að henda heimilissorpi sínu við inngang ráðhússins í Reykjavíkur. Verkfallið hefur verið einstaklega hart og hefur Dagur B. Eggertsson borgarstjóri ítrekað verið sakaður um slæleg vinnubrögð af Eflingu.

Sjá einnig: Dagur svarar Eflingu: „Vildi óska að sami kraftur væri settur í samningagerðina og ítrekað virðist fara í skeytasendingar í minn garð“

Verkfall Eflingar hefur staðið yfir í 11 daga og hefur haft víðtækar afleiðingar í Reykjavík, ekki síst fyrir barnafólk, vegna lokana leikskóla. Annar angi er þó á verkfallinu, þar sem allir borgarstarfsmenn Eflingar í sorphirðu hafa einnig lagt niður störf og eru ruslatunnur Reykjavíkurborgar víða yfirfullar. Því fýkur ruslið um borgina sem aldrei fyrr.

Á Facebook boða Gulu vestin þessi mótmæli. „Styðjum kröfur láglaunafólks með því að setja þrýsting á meirihlutann. Í dag kláraðist enn einn samningafundurinn og því heldur verkfallið áfram,“ segir þar og er haldið áfram:

„Kippið með ykkur heimilissorpinu og hjálpið borginni að forðast yfirfullar ruslageymslur og skilið því einfaldlega beint niður í Ráðhús Reykjavíkur, við aðalinnganginn. Þannig drögum við úr útblæstri og styðjum láglaunafólk í leiðinni! Skilum ruslinu í ráðhúsið!“