Bjarni Benediktsson, formaður Sjálfstæðisflokksins, sagði í Silfrinu fyrr í dag að hann ætlar ekki að hætta sem formaður flokksins á næstunni. Margir hafa spáð því að hann hyggðist hætta fyrir næstu kosningar, sem eru fyrirhugaðar á næsta ári.

Bjarni telur sig njóta stuðnings og er því ekkert fararsnið á honum. „Mér líður þannig að ég sé ekki búinn. Að ég hafi stuðning. Að það sé verk að vinna. Að okkur hafi tekist vel við að fást við afleiðingar fjármálahruns. Að við séum komin á góðan stað og séum farin að horfa til framtíðar. Mér líður vel með það að við séum ekki að tala um höft, skuldastöðu heimilanna, skuldauppgjör fyrirtækja, hallarekstur ríkissjóðs og skuldavanda hans. Heldur að við stöndum á ákveðnum kletti og séum að horfa til framtíðar,“ sagði Bjarni.

Bjarni sagði enn fremur að hann myndi óska þess að kosningar verði haustið 2021. „Ef ég á að segja hug minn allan þá kostaði það blóð svita og tár að komast til valda. Afhverju í ósköpunum ætti maður að gefa það frá sér hálfu ári áður en lög segja til um. Mér finnst ekkert vandamál að kjósa að hausti til. Það hefur bara gengið ágætlega. En ef það verður niðurstaðan að það sé betra út af taktinum gagnvart fjárlögum eða öðru að kjósa að vori þá getur vel verið að það verði niðurstaðan. Eða að menn hafa ekki úthald til að ljúka stjórnarsamstarfinu. Það finnst mér ólíklegt. Í stuttu máli þá vildi ég kjósa að hausti 2021,“ sagði Bjarni.