Dorrit Moussaieff, fyrrverandi forsetafrú Íslands hefur undanfarna daga gefið ansi misvísandi upplýsingar um skoðanir sínar þegar að kemur að forsetakosningunum í Bandaríkjunum, sem munu eiga sér stað í haust. Hún hefur nefnilega lýst yfir stuðningi á bæði sitjandi forseta og einn frambjóðanda Demókrataflokksins.
Líkt og DV greindi frá í seinustu viku þá birti Dorrit mynd af sér og Ivönku Trump á Instagram. Ivanka er dóttir Donald Trump, núverandi Bandaríkjaforseta. Forsetinn og fjölskylda hans er mjög umdeild, það sást vel á viðbrögðunum sem Dorrit fékk, sem voru heldur neikvæð.
Ásamt myndinni birti Dorrit eftirfarandi texta: „Fjögur ár í viðbót, …síðan þurfa Bandaríkin á konu að halda.“
Nú hefur Dorrit aftur birt mynd á Instagram, en að þessu sinnu með einum af frambjóðendum Demókrataflokksins, Michael Bloomberg. Hún tekur fram að myndin er nokkura ára gömul.
„Bandaríska þjóðin er mjög lánsöm að hafa Mike Bloomberg í framboði forseta! Hinn frjálsi heimur verður jafnvel enn lánsamari! MIKE GERIR ÞAÐ SEM HANN SEGIST ÆTLA AÐ GERA!“
Bloomberg er einn ríkasti maður heims, en hann er hvað þekktastur fyrir að hafa verið borgarstjóri New York-borgar á árunum 2001 til 2013, fyrst sem repúblikani og síðan óháður.
Ástæðan fyrir framboði Bloomberg virðist fyrst og fremst vera vegna andúðar sinnar á núverandi forseta, en hann segir að Bandaríkin eigi ekki að þurfa að þola fjögur ár af Trump í viðbót. Trump hefur sagt að áður fyrr hafi hann og Bloomberg verið vinir, en nú eru þeir það alls ekki.