Heilbrigðisyfirvöld á Bretlandi rannsaka nú hvort Wuhan-veiran svokallaða sé komin til Skotlands. Fjórir kínverskir sjúklingar eru á spítala með flensulík einkenni en þeir höfðu allir dvalið í borginni Wuhan, sem veiran ber nafn sitt af, á dögunum.

Í frétt Mail Online kemur fram að tveir þeirra sem nú liggja á sjúkrahúsi í einangrun hafi komið til Bretlands í gegnum London í síðustu viku, áður en þeir héldu ferð sinni áfram til Skotlands.

Minnst sautján eru látnir af völdum veirunnar og þá er talið að allt að 10 þúsund manns hafi veikst. Staðfest tilvik eru þó um 600.

Þrjár kínverskar borgir hafa gripið til aðgerða með það fyrir augum að hefta útbreiðslu veirunnar. Allt flug til og frá Wuhan liggur niðri og þá hafa yfirvöld í Sjanghæ hætt við hátíðarhöld í tilefni af nýju ári sem senn gengur í garð í Kína. Veiran hefur dreift sér til fleiri Asíuríkja. Staðfest tilfelli hafa komið upp í Sádi-Arabíu, Víetnam og Singapúr.

Kínversk heilbrigðisyfirvöld hafa varað við því að veiran muni stökkbreytast og valda enn meiri skaða.