Sif Sigmarsdóttir, einn þekktasti pistlahöfundur landsins, gagnrýnir Þjóðkirkjuna í nýjum pisti sínum sem birtist hjá Fréttablaðinu. Þar gefur hún lítið fyrir skýringar Agnesar M. Sigurðardóttur, biskups Íslands, á rýrnandi vinsældum Þjóðkirkjunna og bendir á að þjóðkirkjan geti margt lært frá djöfladýrkendum.

Samkvæmt Þjóðarpúls Gallúps þá ber aðeins þriðjungur þjóðarinnar fullkomið traust til kirkjunnar. Agnes skýrði þessa niðurstöðu með því að siðrof hafi átt sér stað í samfélaginu í kjölfar þess að sérstakri kristinfræðikennslu var hætt í skólum.

„Stað­festa kirkjunnar að halda til streitu full­yrðingum um eigin sið­ferðis­legu yfir­burði, einka­rétt á kær­leik, til­gangi, lífs­fyllingu og hamingju verður hjá­kát­legri með hverju ári sem líður,“ skrifar Sif. Hún bendir á að fólk sé farið að finna sér andlegt athvarf frá öðrum áttum en frá lúterstrúnni, svo sem jóga, hugleiðslu, núvitund, húmanisma og öðrum trúarbrögðum.

„Ef þjóð­kirkjan væri ekki eins og for­sögu­legur kýklópi, ein­glyrningur með svo tak­markaða sýn að hann sér ekki lengra nefi sínu, kæmi hún ef til vill auga á að gott leynist á ó­væntustu stöðum.“

Til samanburðar bendir Sif á heimildarmyndina Hail Satan? en þar er fjallað um söfnuð djöfladýrkenda, eða satanista, í bandaríkjunum. Þvert á það sem margir gætu talið snýst þessi félagsskapur ekki um að hampa djöflinum í bókstaflegum skilningi heldur er djöfullinn myndlíking.

„Mynd­líking til að tákna þá sem standa utan­garðs, eru öðru­vísi, hugsa sjálf­stætt og passa ekki inn í mót sam­fé­lagsins. Musteri Satans boðar gagn­rýna hugsun, for­vitni, efa­hyggju og skoðana­skipti. Söfnuðurinn sinnir góð­gerðar­störfum og berst fyrir jafn­rétti, kven­frelsi, rétti til fóstur­eyðinga, réttindum sam­kyn­hneigðra, trú­frelsi og að­skilnaði ríkis og kirkju. Yfir­lýst stefna satanistanna er „að hvetja til ör­lætis og sam­kenndar“.“

Musteri Satans starfi, líkt og kirkjan, eftir boðorðum. Boðorðin eru sjö er þykja mun umburðarlyndari og kærleiksríkari en þau sem kirkjan fer eftir. Sif nefnir í dæmaskyni þrjú þeirra.

„– Maður ætti alltaf að gera sitt besta til að sýna öðrum vin­semd og sam­kennd eftir því sem skyn­semi býður.
– Trúar­brögð ættu að að­lagast vísinda­legum stað­reyndum. Þess ber að gæta að vísinda­legur sann­leikur sé aldrei af bakaður í þeim til­gangi að hann falli betur að trúar­skoðunum.
– Fólk er skeikult. Geri maður mis­tök ber manni að reyna að bæta úr þeim eftir bestu getu og bæta fyrir þann skaða sem kann að hafa orðið.“

Agnes hafi með skýringu sinni í reynd kallað þriðjung landsmanna siðlausa.