Fyrr í dag fór maður inn í húsnæði Háskóla Íslands í Stakkahlíðinni og beraði sig við fólk ásamt því sem hann rúnkaði sér fyrir framan hóp af stelpum og káfaði á kennara.

Móðir eins nemanda sem var vitni að árásinni hafði samband við DV vegna málsins. Hún segir að maðurinn hafi verið ungur að aldri og íslenskur.

„Það voru margir sem urðu fyrir árás, hann fór út um allt. Meðal annars þá rúnkaði hann sér fyrir framan hóp af stelpum og hann réðst á kennara og káfaði á henni. Hann faldi sig þarna út um allt þannig hann greinilega þekkti húsnæðið út og inn en það kannaðist enginn við hann.“

Móðirin segir að dóttir sín hafi mætt um hádegið en þá var maðurinn þegar mættur. Hann gekk laus í rúmlega hálftíma eða jafnvel lengur samkvæmt nemandanum.

„Svo var einhver umræða um að það voru ekki allar öryggismyndavélarnar virkar. Það er eitthvað sem þarf að skoða í kjölfarið á svona máli. Hún vill að það verði eitthvað gert í kjölfarið á málinu og að það verði reynt að tryggja öryggi nemendanna eins og hægt er.“

Áhyggjur vöknuðu meðal nemenda vegna nærveru annarra menntastofnana þarna í kring en þar eru nemendurnir mun yngri.

„Þau höfðu líka áhyggjur af því að það er leikskóli og grunnskóli bara þarna rétt hjá. Þannig að nú hef ég áhyggjur af því hvort hann hafi farið þangað fyrst áður en hann fór til þeirra því þessi maður var greinilega gjörsamlega bilaður.“

Sjá meira: Karlmaður fróaði sér í Háskóla Íslands og káfaði á kennara