Lögreglan á höfuðborgarsvæðinu fékk tilkynningu um tvo menn sem slógust utandyra í miðborginni um kvöldmatarleytið í gær. Mennirnir voru sagðir hafa dregið upp hnífa.
Lögregla brást skjótt við og handtók báða mennina og við leit á þeim fundust hnífar sem lagt var hald á. Þeim var báðum sleppt að lokinni skýrslutöku.
Lögregla stöðvaði svo för tveggja fimmtán ára pilta í Breiðholtsskóla á tíunda tímanum í gærkvöldi. Að sögn lögreglu höfðu piltarnir komist yfir lykil og endurtekið leikinn nokkrum sinnum yfir helgina þannig að innbrotskerfið fór í gang. Þeir eru einnig grunaðir um þjófnað og skemmdarverk. Foreldrar drengjanna voru kallaðir til og barnavernd gert viðvart um málið.
