Daníel Eiríksson hefur verið dæmdur í 9 mánaða fangelsi í Héraðsdómi Reykjavíkur, þar af sex skilorðsbundna, fyrir margvísleg afbrot, þau alvarlegustu líkamsárás, ógnun með hnífi og tilraun til ráns fyrir utan ÁTVR í Skeifunni 15.
Daníel var gefið að sök að hafa ásamt öðrum manni framið líkamsárás og gert tilraun til árásar fyrir utan ÁTVR í Skeifunni þann 29. september árið 2017. Ógnuðu þeir manni með hnífi og fóru með hann að hraðbanka í Hagkaup þar sem honum var gert að taka út fé. Ekki var hins vegar innstæða á reikningi brotaþolans. Veittust þeir í framhaldinu að manninum á bílastæði fyrir utan Hagkaup, slógu hann í andlitið með krepptum hnefa og spörkuðu í líkama hans með þeim afleiðingum að hann hlaut eymsli.
Daníel var jafnframt ákærður fyrir fjölmörg umferðalagabrot. Þá var hann ákærður fyrir vopnalagabrot með því að hafa haft í fórum sínum hníf með 15 sm löngu blaði sem lögregla fann við öryggisleit á honum og lagði hald á. Gerðist þetta í október árið 2018.
Ennfremur er Daníel ákærður fyrir fíkniefnalagabrot en hann reyndist hafa kókaín í fórum sínum við leit sumarið 2018. Var hann þá farþegi í bíl sem lögregla gerði leit í.
Daníel játaði brot sín fyrir dómi. Hann hefur þrisvar áður verið dæmdur til refsingar fyrir líkamsárásir, fyrst árið 2010.
Dómurinn var kveðinn upp í Héraðsdómi Reykjavíkur þann 10. september.