Margrét Pála Jónsdóttir minnist sjónvarpsþáttar frá árinu 1997 þar sem áhorfendur greiddu atkvæði um hvort kirkjan ætti að gefa samkynhneigða saman í hjónaband. Í þættinum rökræddi Margrét Pála við presta þjóðkirkjunnar, meðal annars Geir Waage, og segist hafa reiðst heiftarlega. „Ég var svo reið að ég þurfti að halda mér á köflum!“ segir Margrét Pála.

Málið er rifjað upp á RÚV. Niðurstaðan var sú að meirihluti þeirra sem tóku þátt var á móti hjónaböndum samkynhneigðra. Margrét Pála segir að mikið vatn sé runnið til sjávar síðan þá og ótrúlegur árangur náðst í mannréttindabaráttu hinsegin fólks.

Margrét segir að það hafi tekið langan tíma að fá almennan skilning á því að barátta samkynhneigðra snerist ekki um kynhegðun og athafnir í svefnherberginu heldur réttinn til að tjá sínar dýpstu ástartilfinningar og verða ekki fyrir mismunun af þeim sökum. Margrét telur að íslenska ríkið eigi eftir að biðja samkynhneigða afsökunar. Hún hefur jafnframt áhyggjur af versnandi mannréttindastöðu hinsegin fólks víða um heim.