Björgólfur Thor Björgólfsson fjárfestir hafnar því alfarið sem kemur fram í bók Stefáns Einars Stefánssonar, að hann hafi verið hluthafi í WOW air. Þetta kemur fram í nýrri tilkynningu sem Björgólfur hefur birt á vefsvæði sínu. Björgólfur segir að eina aðkoma hans að félaginu hafi verið sú að fallast á að kaupa skuldabréf fyrir 3 milljónir evra í september síðastliðinn. Segir Björgólfur að sá gjörningur hafi verið vinargreiði. Hann segir jafnframt:
Rétt eins og aðrir skuldabréfaeigendur hef ég nú lýst kröfu í þrotabú WOW. Sú staðreynd ein staðfestir að ég var ekki hluthafi í félaginu.
Björgólfur harmar örlög WOW en gagnrýnir um leið meintar rangfærslur í umfjöllun um félagið. Pistillinn er eftirfarandi:
Í nýútkominni bók um ris og fall WOW flugfélagsins er ég ranglega kallaður hluthafi í félaginu, eða öllu heldur að ég hafi verið orðinn hluthafi í því á síðustu dögum starfsemi þess, í krafti þátttöku minnar í skuldabréfaútboði WOW á haustdögum 2018.
Hið rétta í málinu er, að fyrsta og eina aðkoma mína að WOW var að ég féllst á að kaupa skuldabréf fyrir 3 milljónir evra í september sl. Það var persónulegur greiði við vin minn Skúla Mogensen. Eins og allir vita hafði hann unnið þrekvirki við uppbyggingu félagsins en stóð frammi fyrir miklum vanda. Þessar 3 milljónir evra voru greiddar í peningum 26. september sl. Allt frá stofnun félagsins til gjaldþrots þess var þetta eina aðkoma mín að því.
Hvorki ég né nokkrir á mínum vegum tóku nokkurn tímann þátt í þeim viðræðum sem WOW átti við mögulega nýja fjárfesta.
Hvorki ég né nokkur á mínum vegum átti nokkru sinni sæti í kröfuhafaráði WOW. Ég samþykkti hins vegar þær tillögur sem lagðar voru fyrir skuldabréfaeigendur, um hugsanlega breytingu krafna í hlutafé, í þeim tilgangi að bjarga verðmætum, öllum til hagsbóta. Forsenda þeirra tillagna var að nýir fjárfestar kæmu með hlutafé inn í félagið. Það gekk ekki eftir.
Rétt eins og aðrir skuldabréfaeigendur hef ég nú lýst kröfu í þrotabú WOW. Sú staðreynd ein staðfestir að ég var ekki hluthafi í félaginu.
Það er missir að WOW og leitt að ekki hafi tekist að koma félaginu fyrir vind. Ég leyfi mér þó að vona að umfjöllun um málefni félagsins verði rétt og sanngjörn og að rangfærslur, á borð við þá að ég hafi verið hluthafi í WOW eða átt einhverja aðkomu þar aðra en kaup á skuldabréfum sl. haust, heyri sögunni til.
