Guðrún Hrefna Guðmundsdóttir, skólameistari Fjölbrautaskólans í Breiðholti, vill að skóladagurinn hjá unglingum byrji klukkan 10 eða 11 á morgnana. Hún segir að ástæðan sé meðal annars sú að unglingar verða seinna syfjaðir en fullorðnir og af líkamlegum ástæðum þurfi þeir að sofa til 9 eða 9.30 á morgnana.
Þetta segir Guðrún í viðtali við Morgunblaðið í dag þar sem meðal annars er bent á það að margir grunn- og framhaldsskólar hér á landi hafi seinkað byrjun skóladagsins af ýmsum ástæðum.
Guðrún segir að með því að seinka byrjun skóladagsins myndi þar að auki skapast gullið tækifæri fyrir kennara og skólastjórnendur að skipuleggja starfið betur. Kennarar myndu þá mæta fyrr en nemendur.
Í greininni er haft eftir Hrefnu Sigurjónsdóttur, framkvæmdastjóra Heimilis og skóla, að hún finni fyrir áhuga foreldra á að seinka byrjun skóladags. Þá sé ánægja hjá þeim foreldrum sem eiga börn í skólum þar sem slíkt fyrirkomulag er við lýði.
Fjölbrautaskólinn í Breiðholti fékk Gulleplið 2019 í apríl síðastliðnum, en um er að ræða hvatningarverðlaun Heilsueflandi framhaldsskóla. Í frétt á vef Landlæknis um verðlaunin sem FB fékk segir meðal annars að skólinn haldi uppi markvissu starfi til að bæta svefn og svefnvenjur nemenda sinna. Þannig er nemendum gefin frí í fyrsta tíma eftir skólaball og þeim nemendum sem eiga erfitt með að vakna á morgnana gefinn kostur á, í samráði við námsráðgjafa, að hefja skóladaginn klukkan 09.50.
