„Þremenningunum, sem voru handteknir í aðgerðum Lögreglunnar á höfuðborgarsvæðinu gegn skipulagðri brotastarfsemi í síðustu viku, hefur verið sleppt úr haldi. Rannsókn málsins miðar vel, en í þágu hennar hefur verið lagt hald á um 3 kg af amfetamíni, 90 gr. af kókaíni og rúmlega 100 e-töflur. Lögreglan hefur enn fremur haldlagt og kyrrsett eignir, en grunur er um að tilurð þeirra megi rekja til ágóða af brotastarfsemi.“
Þetta kemur fram í tilkynningu frá lögreglunni á höfuðborgarsvæðinu. Þar segir að rannsókn lögreglu, sem staðið hefur yfir undanfarnar vikur, snúi meðal annars að fíkniefnamisferli og peningaþvætti, en ráðist var í þrjár húsleitir vegna þess eins og áður hefur komið fram.
Að sögn lögreglu eru fyrrnefndar aðgerðir liður í baráttu Lögreglunnar á höfuðborgarsvæðinu gegn skipulagðri brotastarfsemi.
„Við minnum á upplýsingasíma lögreglu 800 5005. Í hann má hringja nafnlaust til að koma á framfæri upplýsingum um skipulagða brotastarfsemi, eða önnur brot sem fólk hefur vitneskju um. Ábendingum um brot má jafnframt koma á framfæri í einkaskilaboðum á fésbókarsíðu Lögreglunnar á höfuðborgarsvæðinu.“