„Við höfum dregið úr framboði vegna minnkandi eftirspurnar sem skrifast á hækkandi verðlag á Íslandi,” segir Andy Cockburn, talsmaður easyJet, í samtali við ferðavefinn Túrista.
Túristi greinir frá því að breska lággjaldaflugfélagið easyJet hafi dregið úr flugi til og frá Keflavíkurflugvelli að undanförnu og sú þróun muni halda áfram. Ekki virðist skipta neinu máli þó WOW air sé farið í þrot og samkeppnin því minni en áður.
Í frétt Túrista kemur fram að áætlunarferðum félagsins muni fækka um 17 prósent í janúar og tíund í febrúar, eða um 50 ferðir þessa tvo mánuði. Þannig verður ekkert flug í boði frá London Stansted og þá verður ekki hægt að bóka flug til Íslands með easyJet frá Basel eða Genf.
Túristi hefur eftir Andy að Ísland sé enn vinsæll áfangastaður meðal viðskiptavina easyJet en félagið einbeiti sér að flugleiðum þar sem eftirspurnin er mest.