Rannsókn meintrar nauðgunar blaðamannsins og stofnanda Wikileaks, Julian Assange, mun hefjast að nýju í Svíþjóð. Málið hafði áður verið fellt niður fyrir tveimur árum en lögmaður meints brotaþola fór þess á leit að það yrði tekið upp aftur. Níu ár eru liðin frá því að ásakanirnar komu fyrst fram. Frá þessu er greint á vef Aftonbladet.
Í morgun greindi saksóknarembættið í Svíþjóð frá því að rannsóknin yrði tekin upp aftur. Julian Assange hefur allt tíð neitað sök í málinu. Rannsókn málsins leiddi til þess á sínum tíma að Assange leitaði hælis í sendiráði Ekvador í Lundúnum en með því móti komst hann hjá framsali til Svíþjóðar.
Líkt og áður hefur verið greint frá var Assange handtekinn í sendiráðinu í síðasta mánuði eftir að Ekvadór afturkallaði verndina yfir honum. Hann hafði þá dvalið í sjö ár í sendiráðinu. Í kjölfarið var óttast að Assange yrði framseldur til Bandaríkjanna þar sem hann er sakaður um hlutdeild í stórum gagnaleka þar sem trúnaðargögn Bandarískra yfirvalda voru birt á netinu. Bandaríkin hafa farið fram á að Assange verði framseldur til þeirra frá Bretlandi en þar sem rannsókn á meintri nauðgun verður hafin að nýju þarf að líkindum að taka afstöðu til þess hvort Assange verði framseldur til Bandaríkjanna, eða til Svíþjóðar.