„Fæðingartíðnin hefur aldrei mælst lægri en nú. Í jafn þróuðu og vel upplýstu samfélagi og við státum af dagsdaglega er algerlega óásættanlegt að um 20% allra þungana ljúki með því að fóstri sé eytt,“ segir Inga Sæland, þingmaður Flokks fólksins, í aðsendri grein í Morgunblaðinu í dag.
Í dag er á dagskrá Alþingis lokaatkvæðagreiðsla um þungunarrof sem mun heimila slíkar aðgerðir fram á 23. viku.
„Þar verður að öllu óbreyttu heimilt að eyða ófullburða börnum í móðurkviði fram að 23. viku meðgöngu og það án nokkurra skilyrða, sbr. 1. málsliður 1. mgr. 4. gr. frumvarpsins en þar segir: Heimilt er að rjúfa þungun konu, að hennar beiðni, til loka 22. viku þungunar. Þetta verður mæðradagsgjöf þings til þjóðar,“ segir Inga sem hvetur sem flesta til að fylgjast með atkvæðagreiðslunni um frumvarpið.
„Ég get lofað því að hún mun fara fram að viðhöfðu nafnakalli þar sem hver og einn viðstaddur þingmaður mun þurfa að gefa upp afstöðu sínu í heyranda hljóði frammi fyrir alþjóð, og það verður líka eftir því tekið ef einhver og þá hver kýs að greiða atkvæði með fótunum og láta sig vanta í atkvæðagreiðsluna.
Andstaða Ingu og Flokks fólksins varðandi þetta tiltekna frumvarp hefur varla farið fram hjá neinum sem fylgst hefur með málinu og segir Inga raunar að þetta mál sé það erfiðasta sem hún hefur glímt við síðan hún settist á þing.
„Þetta er átakanlegasta þingmál sem ég hef staðið frammi fyrir síðan ég settist á þing. Frumvarpið kom á sínum tíma sem þruma úr heiðskíru lofti. Umræðan um það í þinginu hefur verið í skötulíki. Meðhöndlun málsins er Halldóru Mogensen, þingmanni Pírata og formanni í velferðarnefnd, sem ber ábyrgð á því innan nefndarinnar, ekki til sóma. Ekkert var rætt um það í kosningabaráttunni haustið 2017 að einhverjir flokkar hygðust leggja þetta mál fram. Hvergi sér þess stað í stjórnarsáttmála ríkisstjórnarinnar. Hvaða öfl standa á bak við það að þrýsta frumvarpinu í gegn og það í nafni kvenfrelsis,“ spyr Inga.
Þá vísar Inga í Reykjavíkurbréf Morgunblaðsins um helgina þar sem fram kom að engin umræða hafi átt sér stað í grasrót Sjálfstæðisflokksins um málið. Inga segist ekki vita hvernig málum er háttað í öðrum flokkum en hún hafi þó ekki heyrt af slíkri umræðu innan Framsóknarflokksins.
„Afstaða Vinstri grænna til aukinnar heimilda til fóstureyðinga þarf hins vegar ekki að koma á óvart og gildir vísast einu um hvort þau mál hafi verið rædd í starfi þess flokks eða ekki. Tölfræðin sýnir að fimmti hver getnaður hér á landi endar með fóstureyðingu. Framkvæmdar eru rúmlega eitt þúsund fóstureyðingar árlega eða 4 fóstureyðingar hvern virkan dag ársins. Engri konu hefur verið neitað um aðgerðina. Það eru einungis um 4.000 fæðingar hérlendis á ári hverju. Fæðingartíðnin hefur aldrei mælst lægri en nú.“
Inga endar grein sína á þeim orðum að það sé óásættanlegt í jafn þróuðu og upplýstu samfélagi að fimmtungur allra þungana ljúki með fóstureyðingu.
„Fóstureyðingar fela iðulega í sér harm og þjáningar fyrir alla þá sem hlut eiga að máli. Hvernig sem atkvæðagreiðslan um fóstureyðingafrumvarp ríkisstjórnarinnar fer í dag, þá er víst að við verðum að taka umræðuna og hefja þjóðarátak í fækkunum fóstureyðinga og um leið að lækka þetta skelfilega hlutfall.“