Þrjú ungmenni voru á dögunum sakfelld, í Héraðsdómi Reykjaness, fyrir eignaspjöll, þjófnað og brennu. Öll brotin voru framin sömu nóttina í maí 2016. Ungmennin voru fjögur en þar sem eitt þeirra játaði ekki brot sín skýlaust var mál þess gert aðskilið máli hinna, sem öll játuðu brot sín.

Aðfaranótt sunnudagsins 8. maí fór hópurinn af stað, að því er virðist. Fóru tvö þeirra og brutust inn í gróðrarstöðina Glitbrá og stálu þaðan kókómjólk og kexi af óþekktu verðmæti. Því næst fóru sömu aðilar inn í áhaldahús Sandgerðisbæjar og stálu þaðan slökkvitæki.

Næst brutust tvö þeirra inn í fiskvinnsluna Nesfisk í Garði. Ollu ungmennin þar miklum skemmdum.

„Á tveimur kaffibrúsum, síma, stól, kaffivél, tveimur kæliskápum, tveimur örbylgjuofnum, stjórnborði loftpressu, hurð, stimpilklukku, borði, eldhúsinnréttingu, hitablásara, þvottavél, skáp, hillu, rafmagnstöflu og búsáhöldum, en áætlað tjón af eignaspjöllunum nam yfir 1,5 milljónir króna, og með því að hafa stolið þaðan exi og mótorhjólahjálmi að óþekktu verðmæti.“

Að lokum lá leið þeirra í áhaldaskúr Sandgerðisbæjar þar sem  þrjú þeirra gerðu til raun til að stela þaðan bensíni. Einn þeirra tók bensín og hellti yfir tjalddúk og kveikti svo í. Af þessu athæfi varð mikill eldur sem olli miklum skemmdum. Áhaldaskúrinn og allir munir í honum eyðilögðust og nam ætlað tjón af brunanum 20 milljónum króna.

Við ákvörðun refsingar var litið til þess að sakborningarnir voru ungir að árum með hreina sakaskrá. Voru refsingar því skilorðsbundnar.