Lögreglustjórinn á höfuðborgarsvæðinu hefur ákært tvo karlmenn fyrir vörslu á metamfetamíni í sölu- og dreifingarskyni. Greint er frá ákærunni í Lögbirtingablaðinu.
Annar þeirra er ákærður fyrir vörslu á 19,47 grömmum af efninu auk 0,7 gramma af marijúana. Þá er sami maður ákærður fyrir brot gegn útlendingalögum en hann hafði í vörslu sinni falsað vegabréf þegar húsleit var gerð á heimili hans þann 7. mars 2018.
Hinn er ákærður fyrir að hafa í fórum sínum 17,23 grömm af metamfetamíni þegar lögregla gerði húsleit hjá honum þann 8. mars 2018.
Mennirnir eru báðir af erlendu bergi brotnir og krefst lögreglustjórinn á höfuðborgarsvæðinu þess að þeir verði dæmdir til refsingar og greiðslu alls sakarkostnaðar.
