Strætóbílstjórar eru vægast sagt ósáttir við þá ákvörðun að láta Kynnisferðir sjá um leið 7. Samkvæmt heimildum DV var ákvörðunin ekki tekin í samráði við bílstjóra og ofbýður þeim það algjörlega.

„Það gjörsamlega sýður á strætóbílstjórum að láta Kynnisferðir hafa leið 7 sem Strætó BS keyrir án útboðs,“ segir heimildarmaður DV.

Leið 7 keyrir frá Spöng, í gegnum Staðarhverfi og að lokum í Leirvogsgötu-Helgifellsand. Mikil ósætti ríkir með þá ákvörðun að bjóða keyrsluna á leiðinni út, en strætóbílstjórar sjá ekki neinar gildar ástæður fyrir breytingunni og upplifa ekkert gegnsæi.

Svo virðist vera að lítil sem engin samskipti við bílstjóra hafi átt sér stað áður en ákvörðunin var kynnt í seinustu viku. Í sambandi við þetta samskiptaleysi eru þau Sigríður Harðardóttir, mannauðstjóri Strætó, og Jóhannes Rúnarsson, forstjóri Strætó, nefnd á nafn og gagnrýnd.

„Þessi ákvörðun var kynnt í síðustu viku  án þess að nokkuð samráð hafi verið haft við bílstjóra eða trúnaðarmenn bílstjóra og bílstjórar eru óánægðir með samskiptaleysi Sigríðar Harðardóttur mannauðsstjóra Strætó og Jóhannesar Rúnarssonar forstjóra Strætó sumir taka svo hart í árinni að þessi ákvörðun hafi verið tekin fyrir ári síðan.“

DV hafði samband við trúnaðarmann strætóbílstjóra sem staðfesti að ástandið væri slæmt og að óánægja væri mikil á meðal bílstjóra.