„Nú er veður í umdæminu okkar orðið slæmt og á enn eftir að versna eftir hádegi í dag, þriðjudag. Veðurspá virðist ætla að ganga eftir, með tilheyrandi hvassviðri og ofankomu. Skólahald í leik- og grunnskólum á Akureyri verður fellt niður frá kl. 13:00 í dag,“ segir í tilkynningu á Facebook-síðu Lögreglunnar á Norðurlandi eystra.
Einnig er búið að fella niður skólahald í Menntaskólanum á Akureyri og í Verkmenntaskólanum. Spáð er aftakaveðri næsta sólarhringinn. „Nú þegar er farið að hvessa og má búast við norðan stórhríð seinni partinn og fram eftir degi á morgun. Foreldrar eru beðnir um að sækja börn í skóla og frístund um hádegi.“
Þá hvetur lögregla Akureyringa til að vera ekki á ferðinni að óþörfu. „Skyggni er ekki gott og má búast við að færð spillist innanbæjar. Leitast verður við að moka helstu leiðir bæjarins eins og kostur er. Ef veðrið versnar mikið þá gæti þurft að leggja aðaláherslu á að ryðja fyrir sjúkrabíla og neyðarakstur.“
Strætisvagnar ganga enn samkvæmt áætlun, sem og ferliþjónusta en lesendur eru hvattir til að fylgjast með heimasíðu Akureyrarbæjar þar sem tilkynnt er um breytingar í þeim efnum.
„Vegna óveðurs verður heimaþjónusta Akureyrarbæjar með skertu sniðu í kvöld og á morgun. Nánari upplýsingar veitir búsetusvið í síma 460-1420.“ Á þessari stundu hefur ekki verið tekin ákvörðun um skólahald í bænum á morgun. Þá hefur komið tilkynning frá Borgarhólsskóla á Húsavík um að skólahaldi þar ljúki kl 13:00 í dag og eru foreldrar hvattir til að sækja börn sín sem fyrst.
Foreldrar barna í leik- og grunnskólum í öðrum sveitarfélögum í umdæminu eru hvattir til að fylgjast með heimasíðum skólanna og viðkomandi sveitarfélags.“