Viðtal Vikunnar við Evu Maríu Hallgrímsdóttur vakti mikla athygli fyrir skömmu. Eva stofnaði fyrirtæki utan um kökuskreytingar sínar árið 2013 og segist hún hafa mætt fjandskap úr bakaraheiminum í kjölfarið. Hún var boðuð í lögregluyfirheyrslu og henni tjáð að hún ætti von á kæru frá Samtökum iðnaðarins.
„Ég titlaði mig ekki bakara, sem er lögverndað starfsheiti, og heldur ekki sem konditor, og ég opnaði ekki bakarí heldur fyrirtæki sem sérhæfði sig í kökuskreytingum,“ segir Eva í viðtalinu í Vikunni og telur fráleitt að hún hafi brotið lög.
Viðtalið við Evu hefur ratað í marga fjölmiðla og nú hefur Landssamband bakarameistara séð ástæðu til að senda frá sér yfirlýsingu í tilefni umfjöllunarinnar. Þar er minnt á að bakaraiðn og kökugerð eru lögverndaðar starfsgreinar og að það sé á herðum iðnaðarstéttarinnar sjálfra að hafa eftirlit með að iðnaðarlögum sé fylgt.
Formaður Landsambandssambands bakarameistara er Jóhannes Felixson – Jói Fel.
Yfirlýsingin er eftirfarandi:
Bakaraiðn og kökugerð eru lögverndaðar starfsgreinar
Í ljósi umfjöllunar um iðnrekstur sem er án tilskilinna réttinda vill Landssamband bakarameistara koma því á framfæri að störf iðnaðarmanna sem og réttur þeirra til að reka iðnað í atvinnuskyni nýtur lögverndunar. Það á við um bakaraiðn og kökugerð. Tilgangur þess er að vernda neytendur, tryggja gæði og fagmennsku enda hafa bakarar og kökugerðarmenn lokið bóklegu og verklegu námi til að öðlast kunnáttu og færni í faginu.
Ekkert eftirlit er til staðar af hálfu hins opinbera um fjölmargar lögverndaðar iðngreinar. Eftirlit með því að iðnaðarlögunum sé fylgt eftir hvílir á herðum iðnaðarstéttarinnar sjálfrar og eina úrræðið er að kæra ófaglærða aðila sem gengið hafa inn á svið iðngreinarinnar til lögreglu. Þetta er óboðleg staða.
Þrátt fyrir að ekkert eftirlit né raunhæf úrræði séu fyrir hendi til að stöðva ólögmæta starfsemi ófaglærðra bakara og kökugerðarmanna áskilur Landssamband bakarameistara sér áfram rétt til að verja hagsmuni stéttarinnar og tryggja vernd neytenda fyrir því að þeir einstaklingar sem starfa á sviði lögverndaðra iðngreina hafi öðlast tilskilda menntun og hæfni til verksins.
