Lögreglan á höfuðborgarsvæðinu stöðvaði akstur sextán ára ökumanns á fimmta tímanum í morgun.
Eðli málsins samkvæmt hafði ökumaðurinn ungi aldrei öðlast ökuréttindi og var málið afgreitt með aðkomu móður og tilkynningu til Barnaverndar. Tveir aðrir farþegar í bifreiðinni voru jafnaldrar ökumannsins og var einnig haft samband við foreldra þeirra.
Rétt fyrir klukkan 23 í gærkvöldi var tilkynnt um þjófnað frá veitingahúsi í Hafnarfirði. Þar hafði óprúttinn einstaklingur farið í starfsmannaaðstöðu þar sem hann stal seðlaveski með kortum. Ekki kemur fram í skeyti lögreglu hvort þjófurinn hafi fundist.
Lögregla hafði svo afskipti af manni í miðborg Reykjavíkur klukkan eitt eftir miðnætti. Maðurinn gat ekki gert grein fyrir sér sökum ölvunar og hafði engin skilríki meðferðis. Hann var handtekinn og vistaður í fangageymslu vegna ástands síns.
Auk þessa stöðvaði lögregla nokkra ökumenn vegna gruns um ölvun við akstur eða akstur undir áhrifum fíkniefna.