Björgunarsveitum á Norðausturlandi og björgunarskipinu Gunnbjörgu á Raufarhöfn, barst útkall á sjötta tímanum í morgun eftir að bátur hafði strandað við Rifstanga nyrst á Melrakkasléttu með tvo menn um borð.
Í tilkynningu sem Landsbjörg sendi um 07.30 í morgun kemur fram að björgunarsveitarfólk sé á leiðinni á vettvang frá Húsavík og Raufarhöfn ásamt öðrum viðbragðsaðilum. Kallaður var til nærliggjandi fiskveiðibátur sem nálgast vettvang ásamt Björgunarskipinu Gunnbjörgu og hefur Þyrla Landhelgisgæslunnar verið kölluð út.
RÚV hafði eftir Davíð Bá Bjarnasyni, upplýsingafulltrúa Landsbjargar, í fréttum klukkan átta að ekki væri vitað til þess að mönnunum hafi orðið meint af.
