Guðjón S. Brjánsson, þingmaður Samfylkingarinnar og fyrsti varaforseti Alþingis, var í forsetastólnum á Alþingi síðdegis í gær þegar Bjarni Benediktsson fjármálaráðherra rauk á dyr. Myndbönd af aðdraganda atviksins og því þegar Bjarni fékk nóg má sjá hér neðst.
Bjarni var ósáttur við fundarstjórn forseta enda hafði hann verið vændur um að brjóta lög um opinber fjármál vegna Samherjamálsins. Vildi Bjarni að Guðjón ávítti þingmenn sem hann gerði þó ekki.
„Þarna var það mat mitt að þetta væru harkaleg orðaskipti en ekki tilefni til þess að víta þingmann,“ segir Guðjón í samtali við Morgunblaðið í dag. Vísað er í lög um þingsköp þar sem segir að forseti skuli ávíta þingmann ef hann ber ráðherra brigslyrðum.
„Þetta er nú alltaf dálítið matskennt. Þarna var ekki verið að bera hann sökum persónulega heldur voru fyrst og fremst gerðar athugasemdir við embættisfærslur ráðherra. Að víta þingmann er mjög alvarlegur hlutur og það er mjög sjaldgæft að gengið sé svo langt að áminna þingmenn fyrir framferði sitt,“ segir Guðjón. Þarna hafi ásakanir ekki beinst að æru Bjarna.
Viðbrögð Bjarna hafa vakið töluverða athygli en myndband af því þegar Bjarni fékk nóg má sjá í seinna myndbandinu hér að neðan.
