„Eitt orð hefur mér ávallt þótt fallegt – „drengskapur“. Ég heyrði þetta orð fyrst í íslenskutíma þegar ég var krakki og fékk þá útskýringu að þetta merkti að vera heiðarlegur – en samt eiginlega svolítið meira. Bæði orðið og merkingin eru falleg.“

Ingvar Valgeirsson

„Mér finnst skúmaskot og gluggaveður æðisleg orð, en kannski er það meira út af því sem kemur upp í hausinn á mér við tilhugsunina um þau orð.“

Fanney Ómarsdóttir

„Orðið „fyrirgefðu“. Vegna þess að það getur lagað til dæmis vináttu hjá fólki og svo margt annað. Að biðjast fyrirgefningar af einlægni. Það finnst mér fallegt.“

Marta Jóhannsdóttir

„Ég hef alltaf elskað orðið „tungumál,“ því það er nákvæmlega það sem orðið segir: Vandamál tungunnar. Einnig elska ég orðið „vinnukonur“ þegar kemur að rúðuþurrkum.“

Jón Sawyer