Sveitarstjórn Borgarbyggðar hefur sagt Gunnlaugi Auðunni Júlíussyni upp störfum sem sveitarstjóra. Þetta kemur fram í tilkynningu frá sveitarfélaginu, en hún er heldur loðin. Þar er einungis talað um „Mismunandi sýn á stjórnun sveitarfélagsins“ en þó fullyrt að sveitarstjórn „standi einhuga á bakvið þessa ákvörðun“.
Gunnlaugur Auðunn Júlíusson er einn þekktasti langhlaupari landsins og hefur getið sér frægð fyrir þátttöku sína í svokölluðum ofurhlaupum þar sem hundruð kílómetra eru lögð að baki.
Frétt sem birtist á Vísi í fyrra vekur upp spurningar um hvað sé í gangi bak við tjöldin í Borgarbyggð. Í þeirri frétt er haft eftir Gunnlaugi að samskipti íbúa við starfsfólk sveitarfélagsins séu oft á neikvæðum nótum þar sem hreytt er ónotum eða köpuryrðum í starfsmenn sveitarfélagsins við skyldustörf.