Aðalstjórn Vals hefur sent frá sér tilkynningu vegna ofbeldisbrots handboltamannsins Sveins Arons Sveinssonar. Hann var fyrir skömmu dæmdur í níu mánaða fangelsi fyrir líkamsárás sem hann framdi á Októberfest fyrir utan Háskóla Íslands árið 2017. DV greindi frá málinu fyrir skömmu.
Samkvæmt dómnum sparkaði Sveinn meðal annars í höfuð mannsins þar sem hann lá í jörðinni. Atvikið átti sér stað aðfaranótt laugardagsins 9. september 2017, á bílastæði við Sæmundargötu í Reykjavík. Sveinn réðst á manninn, sem féll til jarðar, og sparkaði ítrekað í höfuð hans. Í dómi segir að maðurinn hafi hlotið af þessu: „Dreifða heilaáverka, áverkainnanskúmsblæðingu, áverkainnanbastblæðingu, kúpuhvolfsbrot, opið sár á hársverði, opið sár á vör og munnholi, nefbeinsbrot, opið sár á mjóbaki og mjaðmagrind, opið sár á úlnlið og hönd, marga yfirborðsáverka á höfði og brot á bitkanti vinstri framtannar í efri góm.“
Sveinn Aron hefur verið í hópi þekktari handboltamanna Vals undanvarin ár. Valur hefur sent frá sér tilkynningu vegna málsins þar sem kemur fram að félagið frétti fyrst af af brotinu í gegnum fjölmiðla:
„Aðalstjórn Knattspyrnufélagsins Vals hefur fjallað um mál Sveins Arons Sveinssonar leikmanns meistaraflokks Vals í handknattleik, í kjölfar dóms sem hann fékk. Sú ofbeldishegðun sem leikmaðurinn játaði að hafa sýnt er í algjörri andstöðu við allt sem Valur stendur fyrir og hafa því allar forsendur fyrir samstarfi félagsins og leikmannsins brostið. Félaginu er því nauðugur einn sá kostur að rifta samningnum. Með birtingu fréttar um málið í fjölmiðlum fengu stjórnarmenn Vals fyrst vitneskju um þann verknað sem leiddi til hans.“
Valur rekur handboltamanninn Svein Aron fyrir ofbeldisbrot