Karlmaður, sem er meðal annars grunaður um innbrot, nytjastuld og umferðarlagabrot, var á föstudag í Héraðsdómi Reykjavíkur úrskurðaður í fjögurra vikna gæsluvarðhald, eða til 1. nóvember næstkomandi.

Þetta kemur fram í tilkynningu frá lögreglunni. Lögregla segir að gæsluvarðhaldsúrskurðinn sé á grundvelli 1.mgr. 95.gr. l.nr. 88/2008. Þannig er talið að hann hafi rofið, í verulegum atriðum, skilyrði skilorðsbundins dóms.

„Maðurinn var handtekinn í íbúð í austurborginni fyrir helgina, en áður hafði hann virt að vettugi stöðvunarmerki lögreglu annars staðar í borginni og komist undan á bifreið, en við það tækifæri var maðurinn næstum því búinn að aka á lögreglumann sem ætlaði að stöðva för hans,“ segir í tilkynningu lögreglu.