Fyrrverandi ráðgjafi GAMMA í New York, Bretinn Pavan Bakhshi, hefur verið ákærður af bandaríska dómsmálaráðuneytinu fyrir fjársvik upp á tugi milljaða króna. Þetta kemur fram í Viðskiptablaðinu. Málið er ótengt störfum mannsins fyrir GAMMA.

Bandaríska dómsmálaráðuneytið hefur gefið út tilkynningu um Bakhshi þar sem kemur fram að hann og samverkamenn hans hafi svikið hundruð milljóna dollara út úr fjárfestum með blekkingum. Samsvara svikin tugum milljarða íslenskra króna. Er þeim gefið að sök að hafa gróflega ýkt virði fyrirtækis sem þeir stýrðu og þannig fengið fjárfesta með sér í að kaupa félagið og afskrá það. Hafi þeim tekist með sviksamlegum aðferðum  að fá fjárfestingafélag til að fjárfesta andvirði 7 milljarða króna í að afskrá félagið.

Brotin eru sögðu umfangsmikil og hafa átt sér stað á um tveggja og hálfs árs tímabili, frá vori 2015 til hausts 2017.

Maðurinn lét af störfum fyrir GAMMA snemma árs 2018 og sem fyrr segir eru meint svik hans með öllu ótengd störfum hans fyrir GAMMA.