Sjö breskir karlmenn, flestir stórir og sterklegir, voru handteknir eftir að flugvél easyJet sem var á leiðinni frá Manchester til Tenerife var neyðarlent í Faro í Portúgal, vegna slagsmála mannanna um borð.

Slagsmálin brutust út fljótlega eftir flugtak. Flugfreyju tókst þá að stilla tímabundið til friðar milli mannanna, eins og sjá má í myndbandi frá Metro hér að neðan. En síðan hófu mennirnir að slást á ný. Farþegar reyndu þá að skilja mennina að og í þeim átökum hrækti einn mannanna í auga konu um borð.

Öryggisverðir á flugvellinum í Faro eru sagðir hafa tekið mennina engum vettlingatökum og áttu þeir enga möguleika á að brjótast úr haldi þeirra.

Í fréttatilkynningu easyJet vegna málsins segir að atvik á borð við þetta séu sjaldgæf um borð í farþegaþotum félagsins en þau séu litin mjög alvarlegum augum og ógnandi hegðun um borð sé ekki liðin.

Vélin komst á áfangastaðinn Tenerife og tafðist aðeins um tvær og hálfa klukkustund vegna atviksins.