Frá árinu 2009 hefur þeim sem eru heimilislausir eða utangarðs fjölgað mikið samkvæmt því sem kemur fram í nýlegri skýrslu Velferðarvaktarinnar. Árið 2017 voru 349 í þessum hópi og hafði fjölgað um 228 frá 2009. Þessir einstaklingar eiga í fá hús að venda á daginn þegar gistiskýlin eru lokuð.

Meðal þeirra úrbóta sem Velferðarvaktin bendir á er að koma upp dagdvöl með snyrtiaðstöðu, sturtu, mat, fataúthlutun, hvíldaraðstöðu og öðrum möguleikum. Morgunblaðið skýrir frá þessu í dag.

Haft er eftir Regínu Ásvaldsdóttur, sviðsstjóra velferðarsviðs Reykjavíkurborgar, að við athugun sviðsins um áramótin hafi komið í ljós að 50 einstaklingar í verulegum vímuefnavanda hafi verið í forgangi fyrir búsetuúrræði. Haft er eftir henni að fimmtungur þeirra sem gisti í gistiskýlinu við Lindargötu og í Konukoti sé með lögheimili utan Reykjavíkur.