Klukkan hálffimm í nótt var maður handtekinn í Austurstræti grunaður um þjófnað úr verslun. Maðurinn hafði farið út með vörur og var kominn til að stela meiru þegar hann var stöðvaður. Maðurinn var látinn laus að lokinni skýrslustöku.
Þetta kemur fram í dagbók lögreglunnar á höfuðborgarsvæðinu. Segir einnig frá því að maður var handtekinn í annarlegu ástandi við veitingahús á Laugaveginum í miðbænum. Maðurinn hafði verið í slagsmálum, fór ekki að fyrirmælum lögreglu og reyndi að veitast að lögreglumönnum. Manninum var sleppt eftir upplýsingatöku.
Maður í annarlegu ástandi var handtekinn í Lækjargötu í miðbæ Reykjavíkur laust fyrir klukkan fimm í nótt. Maðurinn hafði verið að áreita tvær konur og hafði slegið í bíl. Maðurinn var vistaður sökum ástands síns í fangageymslu lögreglu.
Klukkan níu í gærkvöld var tilkynnt um að þakplata og timbur hefði fokið af þaki fjölbýlishúss í Breiðholti. Þakplatan lenti á tveimur bílum.
Klukkan tíu í gærkvöld var tilkynnt um líkamsárás á veitingastað í Kópavogi. Talið er að maður hafi verið sleginn með glasi í andlitið. Árásarmenn voru farnir af vettvangi en maðurinn var fluttur á Slysadeild til aðhlynningar.
Klukkan 11 í gærkvöld voru svo tveir menn handeknir í Kópavogi grunaðir um aðra líkamsárás. Mennirnir voru vistaðir fyrir rannsókn málsins í fangageymslu lögreglu. Ekki er vitað um meiðsli árásarþolans.
