Kristinn Sigurjónsson, sem rekinn var úr starfi sínu sem kennari við HR vegna ummæla sinna um konur í lokuðum Facebook-hópi, segir að mannauðsstjóri HR, Sigríður Elín Guðjónsdóttir, hafi borið á sig tilhæfulausar ásakanir um kynferðislega áreitni á fundinum þegar hann var rekinn. Þetta kemur fram í umfjöllun Stundarinnar en blaðamaður hennar hefur skoðað umræður Kristins um málið í lokuðum Facebook-hópi.

Kristinn segir ásakanirnar vera dæmi um hvað fólk sé farið að túlka kynferðislega áreitni vítt. Á fundinum hafi Sigríður sagt að hann hafi verið með tvíræða brandara í tímum. Kristinn skrifar í Facebook-umræðunum um þetta:

„Hún ásakar mig um þetta á lokuðum fundi þar sem er verið að reka mig. Ég rakti það fyrir lögmanni, sem spurði hana út í þetta í réttarhöldunum og þar var staðfest að þetta hefði átt sér stað, án þess að þau hefðu nokkra staðfestingu í höndunum, átta mánuðum eftir að þetta var borið fram. Hún getur ekki staðfest þetta. Þetta eru falskar ásakanir, uppspuni.“

Kristinn stendur nú í málaferlum við Háskólann í Reykjavík þar sem hann krefur skólann um 57 milljónir í skaðabætur fyrir meinta ólöglega uppsögn, og 5 milljónir í miskabætur.

Fram kemur einnig í umfjöllun Stundarinnar að rekstor HR, Ari Kristinn Jónsson, hafi borið fyrir dómi að sér hefðu borist kvartanir frá nemendum um klúra brandara Kristrins og konur á vinnustaðnum hefðu tekið ummæli hans mjög alvarlega.