Það er óhætt að segja að Sólrún Diego hafi ekki sýnt það með skýrum hætti að myndband sem hún setti í Instagram-story væri auglýsing. Í rauninni þarf stækkunargler til að sjá örlítið letur þar sem stendur „samstarf“. Til að bæta gráu ofan á svart þá er orðið hvítt og bakgrunnurinn hvítur.

Það er Haukur Bragason sem vekur athygli á þessu á Twitter en í nóvember benti hann á að Tanja Ýr hafi gert þetta. Tíst hans má sjá hér fyrir neðan. DV hefur reyndar nýlega fjallað um að þær hafi báðar auglýst vöru sem fyrirtæki nátengd þeim seldu. Tanja Ýr auglýsti vörur frá fyrirtækinu Bossbabe sem hún á sjálf á meðan Sólrún auglýsti vöru sem var seld af unnusta hennar.

Talsvert hefur verið fjallað um duldar auglýsingar áhrifavalda en helsta tekjulind þeirra er að auglýsa ýmsar vörur. Lögum samkvæmt þarf þó að merkja slíkar auglýsingar. Gjörningur Sólrúnar hlýtur að teljast á mörkum þess, í það minnsta er merkingin að um samstarf sé að ræða svo lítil að erfitt er að greina hana.

Neytendastofa hefur eftirlit með duldum auglýsingum á samfélagsmiðlum. Þórunn Anna Árnadóttir, sviðsstjóri neytendaréttarsviðs hjá Neytendastofu, sagði í samtali við DV nýverið að stofnunin fengi nánast daglega ábendingu um duldar auglýsingar áhrifavalda. „Við fáum mjög mikið af ábendingum um duldar auglýsingar. Þær koma í skorpum og oft er það tengt einhverjum umfjöllunum í fjölmiðlum, en það kemur svo til að meðaltali ábending á hverjum degi,“ sagði Þórunn.

Neytendastofa hefur heimild til að sekta þá sem gerast sekir um þetta. „Sektarheimild er allt upp í tíu milljónir, en við beitum yfirleitt ekki sektum við fyrsta brot. Við metum sektarfjárhæð til dæmis út frá alvarleika brotsins og samstarfsvilja. Einnig kemur til skoðunar hvort viðkomandi sé að brjóta ákvörðun, hvort um gróft brot sé að ræða og sekta í sambærilegum málum,“ sagði Þórunn.

Hér að neðan má sjá færslu Hauks en með því að smella á myndirnar má sjá þær stærri á Twitter.

A new challenger approaches pic.twitter.com/yqipDvBYuy

— Haukur Bragason (@HaukurBragason) June 20, 2019