Ljóst er að Íslendingum er ekki skemmt yfir hegðun Alexanders Tikhomirov en hann deildi mynd af sér við bíl sem hann hafði ekið utan vegar í Bjarnarflagi við Mývatn. Tikhomirov hefur ríflega 300 þúsund fylgjendur á Instagram, þar sem hann deildi myndinni. Ótal Íslendinga hrauna þar yfir Tikhomirov og segja honum til syndanna.
Vísir greindi í gær frá athæfi mannsins en Lögreglan á Norðurlandi eystra sagði í stöðufærslu á Facebook að Tikhomirov verði að greiða sekt vegna athæfisins. „Lögreglumenn frá Húsavík höfðu í dag hendur í hári ökumanns, sem tók upp á þeim ósóma að stofna til utanvegaaksturs í Bjarnarflagi við Mývatn, skammt frá Jarðböðunum. Vitni gerðu lögreglu viðvart um athæfið og ljóst var að viðkomandi hafði ekið með slíkum ákafa að bifreið hans endaði í festu í leirkenndum jarðvegi í nágrenni heitra gufusvæða,“ segir í færslu lögreglu.
Nú hafa verið skrifuð ríflega sjöhundruð ummæli við mynd Tikhomirov og virðast Íslendingar vera fokreið við hann. „Þú ert ekki velkominn á Íslandi lengur,“ skrifar einn maður. Íslensk kona skrifar svo: „Hunskastu heim og komdu aldrei aftur fávitinn þinn.“ Annar Íslendingur skrifar svo: „Við viljum ekki fólk eins og þig“
Ein kona segir að Tikhomirov ætti að skammast sín. „Það að þú ferð til annars lands til að fremja glæp og eyðileggja náttúru er nógu slæmt. En að monta sig af því að þurfa að borga sekt og deila mynd af því er utan míns skilnings. Algjörlega til skammar.“
Einn Íslendingur vonast svo til þess að hann sjái að sér. „Þegar þú hefur tekið hausinn út úr rassinum á þér þá geri ég ráð fyrir því að þú gefir dágott fé til Landverndar, helvítis hálfvitinn þinn.“
