Bókin WOW – Ris og fall flugfélags er nýkomin út, glóðvolg úr prentsmiðjunni.  Höfundurinn Stefán Einar Stefánsson er blaðamaður og viðskiptafréttastjóri Morgunblaðsins. Stefán Einar  fylgdist náið með gangi WOW Air og allt frá því í september 2018 hafði hann þungar áhyggjur af stöðunni. Bók sína vann Stefán Einar á afar skömmum tíma, á innan við tveimur mánuðum, en aðspurður segist hann alls ekki hafa séð fyrir tímasetninguna á falli WOW.  Daginn sem félagið varð gjaldþrota ákvað hann að ráðast í ritun bókinnar. Hafði hann þá þegar viðað að sér miklum upplýsingum um fyrirtækið.

Á kynningarfundi sem Forlagið hélt í Norræna húsinu á bókinni í hádeginu var Stefán Einar spurður um samskipti og samstarf við Skúla Mogensen, fyrrverandi forstjóra og aðaleiganda WOW, við ritun bókarinnar. Stefán sagði að Skúli hafi neitað allri samvinnu:

„Við höfum þekkst lengi og orðið vel til vina en hann var á móti því að þessi bók yrði skrifuð. Vildi hann skrifa þessa sögu sjálfur á öðrum tímapunkti. Það hefði verið betra að sjónarmið Skúla hefðu komið fram í bókinni. Hins vegar tel ég að hann verði einhvern tíma að svara fyrir það sem stendur í henni. Hann verði að efna til samstals um sumt af því sem þarna kemur fram.“

Í bókinni kemur meðal annars fram að við skuldafjárútboð WOW í fyrrahaust hafi um helmingur nýs hlutafjár komið frá þeim hluthöfum sem fyrir voru og farið beint í skuldir. Þá er því einnig haldið fram að nýjar stórar breiðþotur, Airbus A330-900neo, sem WOW Air tók í notkun árið 2017, hafi verið ein versta og afdrifaríkasta ákvörðunin í rekstri félagsins og engin ein ákvörðun önnur hafi stuðlað eins mikið að falli félagsins jafnsnemma og raunin varð.