Landsréttur mun væntanlega senda frá sér tilkynningu í dag þar sem fram kemur að rétturinn muni hefja störf á nýjan leik en dómararnir fjórir, sem voru umfjöllunarefni dóms Mannréttindadómstóls Evrópu, muni ekki taka við nýjum málum.

Fréttablaðið skýrir frá þessu í dag og segist hafa heimildir fyrir þessu. Ef þetta gengur eftir munu aðeins 11 dómarar starfa við réttinn á næstunni. Á grundvelli grunnreglu um sjálfstæði dómsvaldsins verða mál, sem dómara hafa verið úthlutuð, ekki tekin af honum nema að hans frumkvæði. Það er því í höndum fjórmenningana að ákveða hvort þeir segi sig frá málum sem þeim hefur verið úthlutað.

Dómi Mannréttindadómstólsins verður væntanlega vísað til yfirdeildar hans. Ef það verður gert segir Fréttablaðið að til greina komi að setja fjóra nýja dómara tímabundið við réttinn en það er heimilt í brýnni nauðsyn.