Lögreglan hafði í nógu að snúast í nótt. Í miðborginni datt kona í hálku og er talið að hún hafi beinbrotnað og að tönn hafi brotnað. Konan var flutt á slysadeild. Lögreglan aðstoðaði starfsfólk á skemmtistað við að koma ölvuðum manni á brott en hann hafði verið til vandræða þar inni. Það sama var uppi á teningnum á hóteli í miðborginni. Þar var mjög ölvuðum manni vísað út eftir að hafa verið til vandræða.

Lögreglan flutti ölvaðan mann frá slysadeils Landspítalans í Fossvogi í Gistiskýlið. Þá þurfti lögreglan að aðstoða starfsfólk Gistiskýlisins vegna ölvaðs manns sem var þar til vandræða.

Einn var handtekinn í heimahúsi í nótt grunaður um líkamsárás.

Tilkynnt var um mann í annarlegu ástandi inni á salerni veitingastaðar og hafi sá verið að kasta sprautunálum frá sér og krota á veggi. Maðurinn var farinn er lögreglan kom á staðinn en umbúðir af sprautunálum fundust á gólfinu og búið var að krota á veggi.

Tveir ökumenn voru handteknir grunaðir um ölvun við akstur.

Ökumaður var kærður fyrir að aka á 108 km/klst þar sem hámarkshraði er 80 km/klst. Sá var ekki á þeim buxunum að stöðva þegar honum voru gefin merki um að gera það. Þegar hann stöðvaði loksins gaf hann þá skýringu að hann hafi stöðvað það sem hann vildi en ekki þar sem lögreglan vildi. Þetta bætti kæru við málið því hann var einnig kærður fyrir að fara ekki að fyrirmælum lögreglunnar.