Lögreglan leitar nú að ökumanni Benz -bifreiðar sem keyrði utan í bíl í Ártúnsbrekkunni og stakk af. Atvikið átti sér stað um hádegisbilið á sunnudaginn og náðist á myndband.

Tómas Rögnvaldsson, sem var í bílnum sem var keyrt á, segir í samtali við DV að ökumaðurinn hafi misst stjórn á bílnum í ofsaakstri. Mikil mildi er að ekki hafi orðið slys á fólki. Tómas segir bílinn sé óökuhæfur:

„Hann er óökuhæfur. Hægra framhornið er beyglað, svo er brotið ljós.“

Tómas hafði strax samband við lögreglu:

„Það var tekin skýrsla á sunnudaginn strax eftir slysið, þeir eru nú að skoða þetta.“

Tómas birti myndbandið á samfélagsmiðlum. Í lok myndbandsins sést Benz-bifreiðin aka í burt með tjón á hægra afturhorni.