Nawas Sharif, fyrrverandi forsætisráðherra Pakistans, hefur verið dæmdur í tíu ára fangelsi fyrir spillingu í embætti.
Málið á rætur að rekja til uppljóstrana í Panamaskjölunum svokölluðu en í þeim kom fram að Sharif og fjölskylda geymdu mikið fé í aflandsfélögum sem meðal annars voru til að kaupa fokdýrar lúxusíbúðir í London.
Dóttir hans, Maryam, var dæmd í sjö ára fangelsi vegna málsins en hún var talin líklegur arftaki föður síns í pakistönskum stjórnmálum. Sharif dvelur í London þessi misserin en búist er við því að hann muni áfrýja dómnum, að sögn breska blaðsins Guardian.
Sharif hefur í þrígang gegnt embætti forsætisráðherra landsins; fyrst á árunum 1990 til 1993, svo frá 1997 til 1999 og loks frá 2013 til 2017 að hann sagði af sér eftir uppljóstranir í Panamaskjölunum.