Hafnfirðingurinn Gunnar varð fyrir þeirri ólukku á dögunum að keyrt var utan í bílinn hans við Daggarvelli. Atvikið átti sér stað um miðjan dag á mánudaginn og við fyrstu sýn virst viðkomandi hafa verið samviskusamur og skilið eftir miða.

Viðkomandi skildi eftir miða en samviskusamur var hann ekki. Á miðanum stóð einfaldlega: „Sorry. Bilaðar bremsur. Er að skrifa svo enginn hringi í lögguna.“ Gunnar óskaði eftir aðstoð nágranna sinna innan Facebook-hóps íbúa á Völlunum við að hafa upp á þessum óprúttna aðila.

Þar voru flestir á því máli að þetta sé sérstaklega léleg framkoma af bílstjóranum. „Sorglegir aumingjar á ferð. Líklega hefur einhver séð þetta þar sem þessir rífur upp blað og penna til að þykjast,“ segir Villi nokkur.