Sigrún Dóra Jónsdóttir, brá sér á mánudagskvöld út á bílaplanið við heimili sitt í Reykjanesbæ með fjögurra ára gamlan son sinn. Á meðan hún fylgdist með syninum æfa sig að hjóla, bankaði stefnuvottur Sýslumannsins á Suðurnesjum upp á að heimili hennar. Annar sonur Sigrúnar Dóru, sjö ára gamall fór til dyra og þegar hann svaraði því að móðir sín væri ekki heima, afhenti stefnuvotturinn honum stefnu og sagði barninu að afhenda móður sinni skjalið.

Stundin greindi frá málinu í gær. Í samtali við Stundina segir Sigrún Dóra að henni sé algjörlega misboðið vegna vinnubragðanna. „Það varð svo sem enginn skaði af þessu í gærkvöldi, sonur minn er aðeins sjö ára og áttaði sig ekki á hvað var um að ræða. Ef eldri sonur minn, þrettán ára sem líka var heima, hefði farið til dyra og tekið á móti þessu er ég hins vegar hrædd um að hann hefði tekið þetta nærri sér.“

Í framhaldi hafði hún samband við Lögregluna á Suðurnesjum í og tilkynnti um málið enda segist hún telja að um lögbrot sé að ræða. Þá sendi hún einnig erindi á Sýslumanninn á Suðurnesjum, Umboðsmann barna, Sviðsstjóra Velferðarsviðs Reykjanesbæjar, dómsmálaráðherra og velferðarnefnd Alþingis þar sem hún vekur athygli á málinu. Umboðsmaður barna hyggst senda áréttingu til allra sýslumannsembætta vegna málsins.

Í 2. mgr. 82. gr. laga um meðferð einkamála segir: „Stefna verður ekki birt fyrir manni sem er yngri en 15 ára að aldri.“

Í samtali við DV segir Sigrún Dóra að með því að hafa hátt vonist hún til að þetta gerist ekki aftur. „Ég hef í gegnum allt sem ég er búin að ganga í gegnum margoft rekið mig á að við sem samfélag erum ekki nægilega upplýst um einmitt þetta. Börnin eiga réttindi og okkur ber að virða þau, en á þeim er margbrotið.

Ég tel að bæði fullorðnir sem og börn séu engan veginn nægilega vel upplýst um þetta og kalla á átak í þeim efnum.

Mitt „fokk“ er aldrei ábyrgð barnanna minna og allir eiga að leggjast á eitt við að halda þeim utan við það. Það eru skyldur, ekki bara mínar skyldur heldur allra Íslendinga.“