Lögreglan hefur ekki tekið Klaustursupptökurnar til formlegrar athugunar en lögfræðingur lögreglunnar hefur farið yfir ummæli Gunnars Braga Sveinssonar varðandi loforð um sendiherrastöður. Gunnar lýsti fjálglega á upptökunum hvernig hann hefði unnið sér inn greiða hjá Sjálfstæðismönnum með því að skipa, sem þáverandi utanríkisráðherra, Geir Haarde sem sendiherra í Washington á þeim tíma þegar Geir var mjög umdeildur vegna þess að hann hafði hlotið dóm í Landsrétti. Gunnar sagði hafa skipað Árna Þór Sigurðsson sendiherra á sama tíma til að beina athyglinni frá ráðningu Geirs. Taldi Gunnar sig eiga inni hjá Sjálfstæðismönnum vegna þessa. Gunnar hefur jafnframt viðurkennt í viðtali í kjölfar leyniupptökuhneykslisins að hann myndi ekki slá hendinni á móti sendiherrastöðu.

RÚV fjallar um málið og ræddi við Sigríði Björk Guðjónsdóttur, lögreglustjóra á Höfuðborgarsvæðinu. Í fréttinni kemur fram að ástæða þess að lögreglan hefur ekki tekið málið til formlegrar skoðunar kann að vera sú að ekki er lagaskylda að auglýsa sendiherrastöðu. Var því ákvæði bætt inn í þegar gerðar voru breytingar á lögum um utanríkisþjónustu árið 1997.

Þórhildur Sunna Ævarsdóttir, þingmaður Pírata, hefur kallað eftir því að mögulega hafi það sem Gunnar upplýsti á Klaustri varðað við 128. grein hegningarlaga, um viðurlög við spillingu opinberra starfsmanna.