Næstkomandi mánudag, 3. desember mun leikhópur Borgarleikhússins leiklesa hluta úr leyniupptökunum af Klaustri en fréttir af málinu hafa tröllriðið samfélagsumræðunni undanfarna tvo sólarhringja.
Á heimasíðu Borgarleikhússins kemur fram að viðburðurinn muni fara fram á Litla sviðinu en aðgangur verður ókeypis og öllum opinn.
„Eitt af meginhlutverkum leikhússins er að varpa ljósi á málefni líðandi stundar. Með þessum viðburði leitast leikhúsið við að skoða ábyrgð og orðræðu kjörinna fulltrúa í lýðræðislegu samhengi.“
Fyrirhugað er að streyma leiklestrinum í forsal Borgarleikhússins ef að salurinn fyllist. Auk þess verður hægt að fylgjast með því streymi á netinu og verða upplýsingar um það birtar síðar.
Húsið mun opna kl. 20:00 og er fólk hvatt til að mæta tímanlega.
Þetta er ekki í fyrsta skipti sem Borgarleikhúsið stendur fyrir gjörningi af þessu tagi en árið 2010 var skýrsla rannóknarnefndar Alþingis um aðdraganda og orsakir falls íslensku bankanna lesin upp í heild sinni af leikurum en allir starfmenn hússins tóku þátt í viðburðinum á einn eða annan hátt. Lesturinn tók alls 146 klukkustundir.
