Klukkan 22.11 í gærkvöldi var tilkynnt um eld í iðnaðarhúsnæði við Hvaleyrarbraut 39 í Hafnarfirði. Mikill eldur var á efri hæð hússins þegar lögregla og slökkvilið komu á vettvang. Eldurinn barst síðan niður á neðri hæð hússins. Unnið hefur verið að slökkvistarfi í alla nótt.

Þetta kemur fram í tilkynningu frá lögreglunni. Þar segi að slökkviliðið hafi fengið vinnuvél með krabba til að rífa efri hæðina til að auðvelda slökkvistarfið. Slökkvistarf stendur enn yfir á neðri hæðinni. Allt tiltækt lið slökkviliðsins var kallað út.

Veður var slæmt á vettvangi, mjög hvass og rigning en vindur stóð út á haf. Lögreglan og slökkvilið verða áfram við störf á vettvangi. Ekkert er vitað um eldsupptök en sérfræðingar lögreglunnar á höfuðborgarsvæðinu munu rannsaka vettvanginn þegar aðstæður leyfa.