Allt tiltækt slökkvilið höfuðborgarsvæðisins var kallað út vegna bruna sem á sér núna stað í gluggaverksmiðju í Hafnarfirði.
Vísir greindi frá því að miklar sprengingar hafi heyrst á vettvangi og að nokkrar bifreiðar á stæðinu fyrir utan fyrirtækið hafi einnig orðið eldinum að bráð. Hefur umferð verið stöðvuð í kringum svæðið og komast því allmargir íbúar í nærliggjandi hverfi ekki til síns heima.
Lögreglan sendi frá sér tilkynningu á Facebook og biður fólk um að alls ekki koma á vettvang því það geti gert viðbragðsaðilum erfitt fyrir. Veðuraðstæður er afar slæmar en samkvæmt heimildum DV er húsnæðið algjörlega ónýtt.