Héraðsdómur Reykjaness hefur dæmt Sverri Ágústsson í tveggja ára og níu mánaða fangelsi fyrir hafa smyglað í sumar ríflega tveimur kílóum af kókaíni. Athygli vekur hve þungan dóm Sverrir fær í ljósi þess að hann var bæði samvinnuþýður og á að baki engan sakaferil.
Samkvæmt dómi flutti Sverrir 2.150 grömm af kókaíni sem farþegi með flugi frá Barcelona á Spáni, með viðkomu í Frankfurt, Þýskalandi, til Keflavíkurflugvallar, falin í fölskum botni í ferðatösku sinni.
Sverrir játaði brot sitt en við refsingu var litið til þess að hann hafi flutt mikið magn af sterku kókaíni til landsins. Í dómi kemur þó fram að Sverrir hafi hvorki komið að skipulagningu né fjármögnun innflutningsins, hann hafi með öðrum orðum verið burðardýr.
